Why You?? Don't know

Pata nahi tumse yeh baat kaise kahun… Kuchh baatein hoti hain na, jinhe kehne se pehle insaan unhe bahut baar apne andar jee leta hai. Shayad main bhi kaafi waqt se laa raha hoon tumse kehne ki himmat. Mujhe tum achhi lagti ho. Why me? Yeh poochhogi toh shayad main chup ho jaaun. Kyunki tumhari koi ek baat nahi jo mujhe tumhari taraf kheenchti hai… Tumhara baat karna, tumhara achanak chup ho jaana, tumhari woh chhoti-chhoti baatein jinhe shayad tum khud bhi yaad nahi rakhti… Mujhe yaad reh jaati hain. Kabhi bina wajah yaad aati ho, kabhi kisi baat mein tumhari baat yaad aa jaati hai. Maine tumhe pasand karne ka kabhi koi faisla nahi liya tha. Na koi iraada tha, na koi wajah dhoondi thi. Bas pata hi nahi chala kab tumse baat karna achha lagne laga… Kab tumhari fikr hone lagi… Kab tumhari khamoshi bhi kuchh kehne lagi… Aur kab ek “tum” baaki sabse thodi si alag ho gayi. Shayad isi liye agar kabhi tum mujhse poochhogi- “Tumhe main hi kyun pasand hoon?” Toh main tumhe koi khoobsurat wajah nahi de paunga. Bas tumhari taraf dekhkar shayad itna hi keh paunga Pata nahi… Kuchh logon ko pasand karne ki wajah nahi hoti. Bas dil ko unka hona achha lagta hai. Aur mujhe… tumhara hona achha lagta hai.